नेपाली राजनीतिमा शुद्धिकरण आवश्यक रहेकोमा नागरिक अगुवा डा. महेश मान श्रेष्ठले जोड दिएका छन् ।

नेवाः ग्वहालि पुचः काठमाडौं महानगर १७ वडा कमिटीले आयोजना गरेको २० दिने क्षमता अभिवृद्धि प्रशिक्षणको समापन कार्यक्रममा बोल्दै उनले यस्तो बताएका हुन् ।

पछिल्लो समय चर्चामा रहेको भुटानी शरणार्थी प्रकरणले नेपाललाई अन्तर्राष्ट्रिय स्तरमै बेइज्जत गराएको समेत उनले बताए ।

‘बिबिसी, सीएनएन लगायतका अन्तर्राष्ट्रिय संचार माध्यममा पछिल्लो समय नेपालमा व्याप्त भ्रष्टाचार सम्बन्धि समाचार प्रशारण भइरहेका छन् ।

यसले गर्दा नेपालको छवि अन्तर्राष्ट्रिय स्तरमा बिग्रेको छ’ डा. श्रेष्ठको भनाइ हो । नागरिक अगुवा श्रेष्ठले देशभित्रको बहुल पहिचानलाई समेत स्वीकार गरेर अघि बढ्नुपर्नेमा जोड दिए ।

कार्यक्रममा बोल्दै काठमाडौं महानगरपालिकाका प्रवक्ता नविन मानन्धरले पछिल्लो समय नगरभित्र रैथानेहरुको भाषा, संस्कृति, संस्कारमा विलचन आएकोप्रति चिन्ता व्यक्त गर्दै सबै तह र तप्का मिलेर संरक्षण गर्नुपर्नेमा जोड दिए ।

बैसाख ६ गतेबाट सुरु भएको प्रशिक्षण कार्यक्रममा प्रशिक्षार्थीहरुलाई सिलसिला मिलाएर बोल्ने, उद्घोषण, नेतृत्व विकास, संस्थागत संरचना तथा लक्ष्य निर्धारण सम्बन्धिको तालिम दिइएको थियो ।

२० दिने प्रशिक्षण कार्यक्रममा संचारकर्मी केके मानन्धरले सहजीकरण गरेका थिए ।