ललितपुर/ २१ जेठ:  काठमाडौंबाट हेटौंडा जाने कान्तिलाेकपथकाे सडक आज साेमबारबाट पूर्णरूपमा सञ्चालन हुने आयाेजनाका सूचना अधिकारी तथा इन्जिनियर रविन्द्र महर्जनले जानकारी गराउनुभयाे । मर्मतसम्भारका लागि २०८० चैत १ गतेदेखि बन्द भएको सडककाे मर्मत सम्भार गरि आजबाट सञ्चालनमा आएको हाे । 
"ललितपुरको बागमती गाउँपालिकाकाे वडा नं. ३ झाँक्रीडाँडाबाट छपेलीतर्फ कार्कीबासकाे साँघुरो ठाउँमा कटिङ्ग सकिएको छ, काल्चे क्षेत्रमा कटिङ्ग गर्नुपर्ने काम पनि सम्पन्न भएको छ, ललितपुरतर्फ सिङ्गल लेन भएको केही ठाउँमा यस आर्थिक वर्षमा बजेट नपुग भएको कारण कटिङ्गकाे काम सम्पन्न हुन बाँकी छ, बहुवर्षीय टेण्डरमा कटिङ्ग गर्ने भनिएकाे छपेलीबाट काल्चेतर्फकाे खण्डमा मात्रै बाँकी रहेकाे छ। बाँकी काम अर्को आर्थिक बर्षमा हुन्छ, अहिलेलाई सवारी आवतजावतका लागि कान्तिलाेकपथ पूर्णरूपमा सञ्चालन हुनेछ । " महर्जनले भन्नुभयो ।
बैशाख १५ गतेदेखि आंशिक रुपमा खुला गरिएको सडक मर्मतसम्भारका क्रममा कटिङ्ग गर्दा माथिबाट खसेको ढुंगाले पूर्णरूपमा क्षति काल्चे खण्डकाे सडककाे भाग भत्किएपछि बैशाख २१ गतेदेखि पूर्णरूपमा बन्द भएको थियाे। 
काठमाडौलाई हेटौडासंग जोड्ने उपयुक्त र दूरीका हिसावले छोटो मानिएको याे सडक निर्माण थालिएको ६७ वर्ष भैसकेको छ । सडक निर्माणका लागि सेनाको नेतृत्वमा २०१३ मा ट्रयाक खन्न सुरु गरिएको थियो । यो काम २०१६ मा सकिएपछि त्यतिवेला ट्रयाक उद्घाटन गर्दै राजा महेन्द्र हेटौँडाको बुद्धचोकदेखि जिपमा ललितपुरको टीकाभैरवसम्म आउनुभएको थियो । राजा महेन्द्रले कान्ति लोकपथको उद्घाटन गरेको शिलालेख ठिंगन खण्डको सडकको भित्तामा अहिले पनि देखिन्छ ।
विगतका सरकारले याे सडक निर्माणका लागि प्राथमिकता नदिँदा र विगतमा निर्माणको जिम्मा लिएका ठेकेदार कम्पनीले ढिलासुस्ती गरेर काम गर्दा यो सडक निर्माण ६७ वर्षदेखि निर्माणाधीन अवस्थामै छ ।
कान्तिराजमार्गको हेटौँडा बुद्धचोकदेखि ललितपुरको सातदोबाटोसम्म लम्बाइ ९२ किलोमिटर हो । यसमध्ये बुद्धचोकदेखि—टीकाभैरवसम्म ७९ किमि सडक आयोजनाले निर्माण गर्ने हो । बाँकी खण्ड निर्माणको जिम्मा सडक डिभिजन कार्यालय ललितपुरको हो । टीकाभैरवदेखि चापागाउँ बसपार्कसम्म डिभिजन कार्यालयले चौडा पार्ने काम पूरा गरेको भएपनि स्थानीयहरुको संरचनाको अवरोधका कारण ठेचो सुनाकोठीको भाग चौडा हुन नसकेपछि २०७६ सालमा सरकारले निर्णय गरेर सडकको खण्ड टिकाभैरबबाट छम्पी भैसेपाटी हुँदै नख्खुसम्म तय गरेको छ । भैसेपाटीसम्म सडक चौडा भएपछि छम्पी टिकाभैरब खण्डमा भने चौडा हुन बाँकी नै रहेको छ ।