२०७२ सालय् ब्वःगु तःभुखाचं पूवंक स्यंगु मरुसतः सोमवाः लोकार्पण याय्गु ज्या जूगु दु।

राष्ट्रपति विद्यादेवी भण्डारीया मूपाहाँसुइ काष्ठमण्डप पुनःनिर्माण समितिया ग्वसालय् मरुसतः लोकार्पणया ज्या जूगु खः। समितिं मरुसतः २०७२ या स्वरुपय् वय् धुंकूगु जूगुलिं सर्वसाधारणं छ्यले खने माः धइगु तातुना मरुसतःया लोकार्पण यानागु न्ह्यथंगु दु । समितिया नायःलिसें बागमति प्रदेशया सांसद राजेश शाक्यं लसकुस यासें मरुसतः पुनःनिर्माणया झ्वलय् ग्वाहालि यानादीपिं व्यक्ति व थीथी संघसंस्थायात सुभाय् देछानादिल।

थुकथं हे विशेष पाहाँकथं ज्याझ्वलय् ब्वति कयादीम्ह येँ मनपाया मेयर विद्यासुन्दर शाक्यं  मरुसतः दय्के ज्या क्वचाःगु जूसां थुकिया पलिस्था चि व चिकंया भाः छगू हे जुइबलय् तिनि जुइ धइगु धार्मिक मान्यताकथं आःयात सर्वसाधारणया निंतिं चाय्केगु ज्या जक जूगु कनादिल।

वय्कलं थन तयातयागु मूर्तिया सम्बन्धय् सर्वोच्च अदालतय् मुद्दा जुयाच्वंगु व सर्वोच्चया फैसला वय् धुंकाः व हे कथंया ज्याखँ याय्गु तर उकिया हे जक हुनिं तयार जुइधुंकूगु काष्ठमण्डपयात थाँति तयातय् मज्यूगु ताय्काः हे उलेज्या न्ह्याकागु कनादिल। मूपाहाँ राष्ट्रपति भण्डारीं नेपाःया हे सम्पदाकथं मरुसतः धस्वानाच्वंगु खँ कुलादिसें थुकिया पुनःनिर्माणय् ग्वाहालि यानादीपिं व ज्यासनादीपिं सकसितं सुभाय् देछानादिल ।

काष्ठमण्डप पुनःनिर्माण समितिया नायः मा. राजेश शाक्यं येँ महानगरपालिकाया मेयर विद्यासुन्दर शाक्ययात ताःचा लःल्हासें येँ मनपायात हस्तान्तरण याःगु मरुसतःया ताःचाः मेयर शाक्यं राष्ट्रपति भण्डारीयात लःल्हानाः राष्ट्रया हे सम्पत्ति जूगुकथंया सन्देश ब्यूगु खः। राष्ट्रपति भण्डारीं मरुसतलय् तयातःगु लोकार्पण पौया धकिं उलाः उलेज्या यानादीगु खः।